Medaljen glapp for Patrik
Eldre rekrutt Patrik Helle Avsnes var tre innertreff unna medalje i Landsskytterstevne-debuten.
Fredag klokka 12 gjekk finalen i feltskyting for eldre rekrutt under Landsskytterstevnet på Voss.
Patrik Helle Avsnes frå Finnøy skyttarlag låg i delt leiing saman med ei røys andre skyttarar som hadde 30 treff og fullt hus frå den innleiande skytinga.
I finalen blei det tolv av tolv treff på Patrik og sju sentrumstreff. Det heldt til ein 26.-plass i den harde konkurransen. Grensa for medalje gjekk ved tolv treff og ti sentrum.
– Eg er heilt greit fornøgd. Det kunne gått betre, og det kunne gått verre, seier Patrik til Øyposten rett etter finalen:
– Eg får heim å øva så eg blir betre til neste år. Målet er førsteplassen.
Førsteplassen i feltskyting for eldre rekrutt på Voss gjekk til Snorre Sverkmo Julnes frå Namdalseid og Lyngen med tolv treff og tolv sentrum i finalen.
Den 14 år gamle Patrik frå Finnøy var med på Landsskytterstevnet for første gong, og han beit godt frå seg med personleg rekord både på bane og i felt.
