Denne gjengen starta showet på Leikvoll torsdag kveld. Foto: Finnøy Idrettslag

Onsdag kveld reiste kvinnene frå Rennesøy til Vigrestad for å syne musklar. Det klarte dei godt, og kampen enda 2–5 til bortelaget.

Dette lovar godt for det unge laget, som no offisielt har spelt sin første seniorkamp, og Rennesøy Fotballklubb sin første seniorkamp. No er dei vidare i Rogalandscupen.

Både Finnøy og Mastra spelte kvar sin cupkamp torsdag kveld.

Finnøy heime

Det regna godt, men mange hadde likevel kledd seg godt for å vere med å støtte laget sitt på Leikvoll.

Finnøy tok i mot svartkledde Ganddal på heimebane. Ganddal speler to divisjonar over i serien, og på grunn av nivåforskjellen fekk Finnøy starte med to straffar.

Morten Engebretsen leverte sitt straffespark rett i mål, og heimelaget leda 1–0. Anders Eike bomma på sitt forsøk. Finnøy leda 1–0 i heile seks minuttar.

Det blei ein målrik kamp, for det meste feil veg, faktisk tre gonger i kvar omgang. I 76. minutt klarte Håkon Baustad Kavli å skåre for Finnøy og eit ørlite håp var tent. Men det gjekk fort over. I 87. minutt skåra Ganddal igjen, sitt sjuande mål, og kampen enda 2–8. Finnøy er offisielt ute av Rogalandscupen.

Som trøystepremie for ihuga fans kan de sjå Morten Engebretsen sitt straffespark her:

Mastra borte

Mastra gjorde det langt betre i sin bortekamp mot Tasta. Kampen blei sendt direkte på Aftenbladet.no.

Det var ikkje særleg spennande, for øyfolket dominerte og lét ikkje tastagutane sleppe til. Denne kampen enda 0–4 til Mastra, og dermed er dei vidare i cupen.

På skåringslista står Tore Aske (10 minuttar), Mats Marius Hagelund Ueland (40 minuttar), Ragnvald Sørbø (48 minuttar) og Ole Helland Teigen (94 minuttar).

Etter kampen sa mastraspelar Tore Aske:

– Det starta tidleg med mål, og det er bra for sjølvtilliten. Me tar kamp for kamp i cupen og prøver å kome så langt me klarer.

Tore Aske (t.v.) og Mats Ueland blei intervjua av Aftenbladet etter kampen. Foto: Skjermbilete frå Aftenbladet.no