Til saman 55 barn frå Mastra og Finnøy idrettslag deltok på Coop Finnøy keeperskule denne helga.
Det var Jarek Klawikowski i Finnøy idrettslag som hadde gått keepertrenarskulen og som tok initiativet til samlinga, og hovudsponsor Coop Finnøy stilte med lunsj til alle deltakarane.
Samlinga var gratis for alle som deltok.
De 55 deltakarane blei hjelpt av gode hjelparar i Finnøy-fotballen, både på treningsfeltet og i matserveringa. Foreldre frå Mastra stilte også opp til oppgåver som plutseleg dukka opp, slik at sjølve arrangementet hadde god flyt.
– Dagen starta med keeperretta oppvarming, gjennom ei egen variant av oppvarmingsøvinga «skadefri», før ein begynte med keeper-basisteknikk som ulike typar grep på ballen, i ulike situasjonar, skriv Finnøy idrettslag om arrangementet.
Jarek fekk god hjelp frå A-lagsspelarane Morten Engebretsen og Aksel Reilstad, som demonstrerte både «Diamantgrep» og «dobbeltV-grep» for barna, og var tilgjengelege for gode tips og triks gjennom hele dagen.
– Etter lunsj var det bare å kome seg på jobb igjen. Nå med andre øvingar, med fotarbeid, posisjonering og skotstopping meir i fokus. Barna heldt fram i same gode stil, og man fekk definitivt sjå mange komande keepertalent på Leikvoll denne dagen. Jarek hadde lagt opp gode og varierte øvingar, og vi er sikre på at mange unge keeperar (og trenarar og føresette) tar med seg mykje inspirasjon til å fortsette keepertrening på eiga hand, på egne lag og på fritida etter denne inspirasjonen, skriv Finnøy Idrettslag vidare.