Silje fekk øydelagt felgen to dagar på rad langs den same vegen
Silje Østhus ber fylket fikse Hanasandveien etter to kostbare bilskader.
– Eg har inntrykk av at fylket og kommunen stort sett prioriterer vegar som allereie er fine, seier Silje Østhus i Østhusvik.
Nyleg fekk ho øydelagt bilen to dagar etter kvarandre langs den stadvis så smale Hanasandvegen mellom Østhusvik og Hanasand. Første uhell skjedde rett ved Hanasand gård.
– Det kom ein traktor imot meg i stor fart, så eg måtte legge meg ut i kanten. Sjølvsagt var det fullt av holer med ein gong du kom utanfor vegbanen, så eg bøygde felgen og måtte betale fleire tusen kroner for å få fiksa det, seier Silje.
Same ein gong til
Dagen etter var det reprise, nå nærare rundkøyringa ved utløpet av Finnøytunnelen:
– Eg møtte ein buss og måtte ut i kanten, der det sjølvsagt også der var fullt av holer.
Ho har prata med fleire på Rennesøy som har liknande erfaringar.
– Me er mange som er irritert nå på grunn av dei smale og dårlege vegane her, seier Silje.
Ho bur og jobbar i Østhusvik. Planen er at ho snart flyttar til Mosterøy, der ho har ein type. Då blir det å pendle til jobben i Østhusvik.
Asfalterer neste år
Ho har sendt brev til både Stavanger kommune og Rogland fylkeskommune for å klage på vegstandarden. Hanasandvegen er fylkeskommunens ansvar, svarar kommunen.
– Fylket svarar at dei er i ferd med å utbetre Hanasandvegen og at heile strekninga vil bli asfaltert på nytt neste år. Dei skal òg gjere vegen breiare nokre stader, men ikkje over alt, skriv dei, fortel Silje.
– Å fylle i holene burde dei kunne gjere med ein gong, legg ho til.
Kart som viser omtrent staden for det første uhellet til Silje Østhus:
