Silje er Øypostens nye journalist

Silje Talgø Klakegg (37) provar at Øyposten i sommar har vore gjennom eit generasjonsskifte.

Talgjebu Silje Talgø Klakegg har alltid lika å skrive, og nå gjer ho det på heiltid.
Publisert: Publisert:

Før sommaren overtok Sigbjørn Høidalen som redaktør i Øyposten etter Rune Nedrebø.

Etter sommaren har Silje Talgø Klakegg overtatt som journalist etter Oddbjørg Måland. Silje har 100 prosent stilling, der Oddbjørg hadde 50 prosent, så dette er ei styrking av redaksjonen.

– Kven er du, Silje?

– Eg er nok i alle fall den største Haugesund-patrioten på Finnøy. Her pratar me om fotball. Finnøy IL kjem på ein god andreplass, svarar Silje:

– Elles kan det vere greitt å få med at eg frå og med i haust er ferdig som politikar.

Silje har i inneverande periode representert Rødt i Finnøy kommunedelsutvalg og i Rogaland fylkesting. Elles er ho for fleire i lokalmiljøet kjent som ho i den grøne bilen.

Ho kom frå Haugesund til Finnøy som 19-åring, etter å ha møtt ein mann frå Sjernarøyane. I dag har ho tre døtrer og har flytta til Talgje. Ho kjem frå jobben som fagarbeidar i Hagatoppen barnehage:

– Eg har alltid jobba med folk. Eg har jobba i tre barnehagar i Finnøy, på Fåtunet og på Finnøy skule.

Før ho flytta til Finnøy var ho sommarvikar som journalist i Karmsund Avis. Ho starta på journalistutdanning i Oslo, men så blei ho gravid og livet tok ein annan veg. Etter jobbskiftet i sommar kan ho bruke arbeidsdagane på det ho eigentleg alltid har lika; å skrive.

– Som journalist i Øyposten møter eg mange interessante folk. Så langt har det vore veldig kjekt, seier Silje.

Publisert: