RENNESØY:
Både skulesjefen og varaordføraren er svært imponeret over skulehagen i Hellandsveien 12 i Vikevåg.,
-Det er ein flott hage, seier skulesjef Jørn Pedersen til Øyposten, og ordførar Dagny Sunnanå Hausken er ikkje snauare.
-Eg skulle ønska alle skular i Stavanger kunna ha ein så flott hage, sa ho under åpninga.
Skulehagen ligg på garden til lærar og odelsjente Hildegunn Håvarstein Hausken, og er komen i stand med god innsats frå familien hennar, foreldre og lokalt næringsliv. Hagen er støtta økonomisk av 95.000 kroner i såkornmidler, og 100.000 kroner frå Sandnes Sparebank.
Hagen ligg utrolig flott til, i ei lun skråning med prima utsikt over Mastrafjorden, og med store, flotte eiketrær ruvande i bakkant.
Planta epletre
Ifølge skulesjefen i Stavanger er det skulehagar andre stader også i kommunen, den mest kjente ligg på Storhaug, men hagen på Vikevåg overgår likevel det meste han har sett.
-.Det må liggja utruleg mykje arbeid bak, for dette er skikkeleg gjort, seier Jørn Pedersen.
Hagen blei offisielt åpna ved at Dagny Sunnanå Hausken planta eit epletre av sorten "Nanna"saman med femteklassingane Tuva R. Olsen og Leon Aslaksen.
Det vanka også blomster og takk til Hildegunn Håvarstein Hausken, som har fått hagen i stand.
Rektor Tone Finnesand på Vikevåg skule er svært glad for at skulen har fått dette nye tilbudet.
-Sjølv om me bur landleg til på Rennesøy, er det likevel mykje å læra her, seier ho til Øyposten.
I varm augustsol framstår skulehagen som ein mønsterhage, med vakre blomster, pyntelege stiar, bålpanner og vatningkanner på G i ei sjarmerande hagetralle. I hagen veks bær og grønsaker av mange slag: løk, sukkererter, grønkål, strandkål, purre, jordskokk, rødbetar, salat poteter, knutekål og bær frå ulike bærbuskar. Her er mykje å lukta på og mykje å smaka.
Ynskjer gapahuk og drivhus
Ifølge Håvarstein Hausken har ho også hatt god hjelp av dei som gjekk ut frå sjuande klasse i vår til å ordna til hagen.
-Dei har spadd, planta og luka, seier ho.
Til åpninga var første og femte klasse frå Vikevåg skule invitert, fleire var det ikkje plass til, og dei fekk etterpå kvar sitt pappbeger med ei gulrot, ei plomme, stangselleri og ein blom frå blomkarse. Alt saman etande.
-Barna vil også gulrøter i hagen, det manglar me, og det skal me få til neste år, lovar Håvarstein Hausken, som også ynskjer seg ein gapahuk og drivhus i skulehagen.
-Drivhus høyrer heime i ein skulehage på Rennesøy kor det er så mange tomatgartneri, seier ho.