FINNØY:
I veka som var hadde kommunen åpne møter både på Fogn og Finnøy for at folk skulle koma med innspel til "Grøn plan", som er navnet på den delen av arealplanen som omhandlar natur og friluftsliv i planen.,
-Me fekk mange innspel, som me nå skal fordøya og sortera litt, før me lagar ei oppsumering som blir lagt ut på nettsida vår. Innspela som skal med i den nye kommuneplanen må vera ferdig til påske. Men før me kjem så langt kjem me mellom anna til å involvera kommunedelsutvala i Finnøy og Rennesøy, seier prosjektleiaren for Grøn Plan i Stavanger kommune, Felicitas Heimann til Øyposten.
Ho legg til at turen til Finnøy og Fogn også var for at dei som jobbar med planen i kommunen skulle gjera seg betre kjent på dei to øyane. På vogn var det rundttur med buss på øya og møte med bygdefolket etterpå. Rundt 27 hadde møtt fram på skulen for å møta kommunen sine planleggjarar, og både lysløype, plass til å slå opp telt og tenna bål og parkering til badeplass blei spelt inn. På Finnøy var det møte i Innbyarrtorget, og representantar for mange av dei andrer øyane hadde møtt opp.
-Kva innspel fekk de?
-Me har fått innspel om mange områder. Korleis områda blir brukt i dag og kanskje kan brukast endå meir i framtida, og om viktige naturområder som kanskje bør bevarast.
Men me har også fått med oss at ikkje alle ynskjer endå fleire turgåarar, og at gjengroing av grøntområder er eit problem. Me må samarbeide med landbruket og grunneigarane for at det fortsatt skal vera landbruksdrift og beiting av desse områda for å halda landskapet åpent og tilgjengelig, understrekar Heimann.
-Kom det forslag om turvei langs sjøen rundt Finnøy?
-Nei, men eg har fått med meg at dette har vore spelt inn tidlegare. Det er ein kjempe interessant tanke, seier Heimann, som ber folk som har noko på hjerta om friområda i kommunen om å ta kontakt.
-Send meg ein epost, me er glad for alle innspel. Det er ikkje for seint, seier ho.