Nye krefter tek over styringa av Hesby Auto

Frå nyttår ga Andreas Hesby frå seg ansvaret i Hesby Auto til sonen Espen. Han gledar seg til å føra Finnøys einaste bilverkstad vidare.

FINNØY: Andreas Hesby blir 67 til sommaren, og fann ut at det er på tide å overlata ansvaret til sonen. Frå nyttår av er det Espen Hesby som er dagleg leiar i bedrifta, men Andreas reknar med å hjelpa til i verkstaden også vidare.

-Det skal bli fint å sleppa ansvaret. Me har samarbeidd lenge, så dette er eg sikker på skal gå kjempefint, seier Andreas Hesby til Øyposten.

Espen Hesby gledar seg til å driva verkstaden på Finnøy vidare, foreløpig i kjente spor.

–Men kanskje me bør tenkja litt nytt med tida, seier han.

Lærling frå Rennesøy

Den spede begynnelsen til Hesby Auto var i 1982, etter konkursen i Finnøy Autoservice på Judaberg.

-Eg begynte å skrua litt på traktorar for å hjelpa bøndene på øya, seier Andreas Hesby.

Etter kvart utvikla det seg, og i 1990 fekk han sin første tilsette. I dag held bedrifta sju mann i arbeid, inkludert Andreas og Espen, og omset for 7–8 millionar kroner i året. Dei er sertifisert bilverkstad, også til elbilar, har eigen lakk-avdeling og «dekk-hotell». Dessutan er dei medlem av kjeden MECA.

-Det er ein stor fordel å ha ein kjede i ryggen. Mellom anna er dei flinke til å kursa folka våre, seier dei to blada Hesby.

Gleda over å mekka og skrua er noko som har gått i arv frå far til son. Andreas Hesby «elska» å skrua på mopedar, og raca rundt på øya litt før han eigentleg hadde lov.

Begynte med å skru på syklar

Espen begynte med å mekka på syklar, før han gjekk over til mopedar og motorsyklar. Den første bilen, ein pickup, sette han i stand i konfirmasjonsalderen.

-Det er kjekt å få noko til å sviva og gå, seier han. Seinare tok han fagbrevet som bilmekanikar hos Øyjord bilverkstad i Stavanger. Staben i Hesby Auto er lokale, frå Finnøy, Fogn og Rennesøy, noko både Andreas og Espen meiner er ein stor fordel.

-Mange unge som utdannar seg til bilmekanikarar, vil heller jobba i Nordsjøen. Difor er det ikkje så lett å få tak i folk, seier dei.

-Korleis er tilstanden på bilane i Finnøy?

-Den er stort sett bra, men folk burde vore nøyare med understellsbehandling. Det vil dei ha mykje igjen for. I dag blir det brukt saltlake på vegane om vinteren, og spora etter det ser me på mange bilar. Enkelte er fulle av rust, og då er det nok for seint å berga dei frå rusten, seier Espen og Andreas Hesby.