FINNØY:
Det omfattande restaureringsarbeidet av middelalderkyrkja i Hesby er blitt større enn først rekna med. Mellom anna skal glasmaleriet sendast til Trondheim for restaurering der.,
Det gjer at kyrkja blir stengd i tre månader i vinter. I desse tre månadane vil det bli gudstenester og andre kyrkjelege handlingar i bedehuset Bethel på Judaberg, opplyser Heidi Bø Sangedal i Finnøy-kyrkja til Øyposten.
Første gudsteneste i Bethel blir søndag 16. januar. Den tillyste konserten med Sveinung Hølmebakk 31. januar blir flytta til Talgje kyrkje. Kyrkja i Hesby vil åpna igjen 28. mars i forbindelse med det planlagte pasjonsspelet helga etter.
Restaureringsarbeidet i Hesby-kyrkja inneber mellom anna å meisle ut fuger og steinkliar i fasadar for å åpna murverket slik at det får "pusta". Etter å ha åpna murkverket nå i haust har det vist seg at det er til dels mykje vatn i murverket.
Dessutan skal også glasmaleriet i aust rehabiliterast. Glasmaleriet må handterast forsiktig, vil bli restaurert av glasverkstaden til Nidaros Domkirkes Restaureringsarbeider alt i januar. Då vil glasmaleriet bli demontert og frakta til Trondheim av glasverkstaden til Nidarosdomen.
Og samtidig med at glasmaleriet er ute, er det avgjort å utføra nødvendig arbeid med meisling innvendig i koret i kyrkja. Dette betyr også at murverket i Hesby-kyrkja kan få noko lenger tørketid, noko som bare er positivt for sluttresultatet.
Koret vil vera stengt fram til slutten av mars, men etter dette vil kyrkja vera åpen igjen, så langt ein kan sjå nå. Men restaureringsarbeidet gjer at ting kan endra seg, blir det påpeika. Kyrkja kan også bli stengd i kortare periodar etter mars, på grunn av teknisk arbeid.
Utvending meisling og arbeidet med ny fuging vil pågå heile neste år.