Det blir lefse og krotekake til jul på Finnøy i år

Det duftar av lefse, krotekaker og nordlandslefser på skulen på Finnøy, då husflidslaget på øya sist laurdag arrangerte kurs i tradisjonsbaking.

FINNØY: -Det er viktig å ta vare på tradisjonane, meiner kursleiar Grethe Lunden. Fire kursdeltakarar kjevlar på deig, strør på med mjøl, rullar bakverket opp på tynne pinnar og brettar det ut over steiketakka.

Det er ein liten kunst, men Grethe Lunden har kontrollen. Ho har lært kunsten av ei godt vaksen suldalsdame for mange år sidan. Kursdeltakarane Annbjørg Austbø, Inga Roda, Astrid Furre og Anne Lise Sherling er nybegynnarar i faget, men er ivrige etter å læra.

-Det er nokre viktige triks, seier Astrid Furre.

-Mellom anna må lefsedeigen vera varm. Det ordnar me med å setja bakstebrettet med deigklattane over vasken, kor det er varmt vannbad under, forklarer ho.

Grethe Lunden er imponert over kor raskt Finnøy-kvinnene tek kunsten med lefsebakinga.

-Denne står til ein seks’ar, seier ho om ei perfekt rund lefse som ligg og steiker på steiketakka.

-Kor tynne skal lefsene vera?

-Du skal nesten kunna sjå gjennom dei. Dei gamle bakstekonene ville helst ha dei som eit tynt slør, seier Lunden, som legg til at «tålmodighet» og «nok mjøl» er viktig for å laga ei vellukka lefse.

For å få eit godt resultat ligg det lefseduk frå Tynset til å kjevla ut lefsa på. Den er rund og laga av seilduk. Men eigentleg er lefsedukar å oppdriva også andre stader, til dømes på Jernia på Tasta.

-Eg brukar Tasta-duk, seier Inga Roda muntert.

Etter at lefsene er steikte, blir dei lagt i laken til bløyting, og deretter smurde med smør, melis og rømme. Så er det rett i frysar, i påvente av at jula sitt komme.