Stavanger vil prøva å få bygdevekstavtale for øyane i nord

Kommunedirektøren skal nå sjekka med regjeringa om Stavanger kan få bli med i ordninga med «bygdevekst-avtalar». Men det blei ytra sterk tvil i kommunestyret måndag om Stavanger vil bli vurdert som ein distriktskommune.

STAVANGER: Det var Krfs Henrik Halleland som tok opp den utfordrande situasjonen med nedgang i folketalet på øyane i Finnøy som er avhengig av ferje.,

Halleland viste til at Støre-regjeringa i Hurdals-plattforma har sagt den vil oppretta bygdevekstavtalar, kor eit par skal opprettast i kvart fylket. Dette er eit spleiselag mellom regjeringa, statsforvaltaren og kommunane om næringsutvikling i distrikta.

Halleland ville at Stavanger skulle søkja på å bli med i ein bygdevekstavtale for øyane i Finnøy utan fastlandsforbindelse. Han framheva også Øyfast som viktig for å kunna snu folketalsutviklinga.

Ordførar Kari Nessa Nordtun var langt på veg enig, men stilte likevel spørsmål ved om staten ville rekna Stavanger som ein distriktskommune.

-Men at me har distriktsutfordringar, er det ingen tvil om, sa ho.

Nessa Nordtun meinte også at det ville vera ein god anledning til å fremma Øyfast når regionalplanane for fylket skal opp til ny behandling til hausten.

Eit enstemmig kommunestyre slutta seg til forslaget frå ordføraren om å be kommunedirektøren undersøkja mulighetene for Stavanger kan få ein "bygdevekstavtale".

Kommunestyret var imidlertid delt når det galdt Øyfast, eit prosjekt som både Venstre og mdg er klart i mot.

Venstre ville heller satsa på hyppige ferjeavgangar og utslippsfrie hurtigbåtar, mens MDGs Håkon Fossmark meinte øyane i Ryfylke vil missa særpreget sitt viss det blei bygd "vegar, bruer og tunnelar" slik Henrik Halleland foreslår.

-Då vil dei ikkje lenger vera øyar, meinte Fossmark, som likevel enda med å støtta forslaget om at prosjektet blir utgreia.

Høyres Sissel Knutsen Hegdal ba alle kommunestyre sine representantar ta ein tur ut i øyriket for å sjå kva muligheter som ligg der. Også ho var "meget bekymra" for folketalsutviklinga, og støtta forslaget om å utreda Øyfast.

-Då vil me få eit betre grunnlag for å ta ei beslutning om Øyfast, sa Høyres ordførarkandidat.

Fleirtalet i kommunestyret ber om at Øyfast-prosjektet blir prioritert i forbindelse med den nye regionalplanen for Ryfylke, som kjem til behandling i fylket i haust.

Venstre stemde mot av miljøhensyn, mens Krf, Frp og Pensjonistpartiet stemde mot dette punktet fordi Finnøy nå er ein del av Stavanger, som igjen er ein del av regionplan Jæren.

-Me vil difor ha svært lite å seia når det gjeld regionplanen for Ryfylke, meinte Halleland.