Elevane heldt videotale: – Tenk så heldige me er

Elevar sytte for ungdommeleg vri på nasjonaldagsfeiringa på Finnøy.

På Finnøy er det sjuande trinn i grunnskulen som har ansvaret for å arrangere 17. mai. Elevane der framførte raplåten «Til Dovre faller» og leverte årets 17. mai-tale i videoform.

«Tenk så heldige me er» var omkvedet i videotalen. Elevane viste til at me har då både gratis helsehjelp og gratis ferje, og at me til trass for dyrtid har reint vann og straum som kan lade både bilen og mobilen.

– Tenk så heldige me er som bur i eit land der jenter kan bli brannmenn og gutar kan bli sjukepleiarar, var bodskapen frå elevane i det friske innslaget.

Rammene for årets 17. mai var dei aller beste, med mykje sol og bris nok til å strekke ut flagg og kjøle ned folk i bunad. Fleirbrukshallen, der det i tillegg til underhaldning blei servert pølser, lapskaus og kaker, var smekkfull av folk.

Ein fast post på programmet er premiar for innslag under bilkortesjen og folketoget. I år blei desse kåra:

Beste innslag under bilkortesjen: Kristoffer Milje

Beste traktor: Steinnes Gard

Beste bil: Ellen Haraldseid

Beste innslag i folketoget: Sjetteklasse

Etter programmet i hallen var det leiker oppe på idrettsbanen. Her er fleire bilete frå feiringa: