Sundag 5. januar neste år startar bibelesarar på Fogn bibel-maraton for tredje gong.,
Det er Unni Østhus som har teke initiativ til prosjektet, og med seg har ho Heidi Bø Sangedal og ansvarskomiteen i kyrkja.
- Det tok oss 81 timar å lesa Bibelen ifrå perm til perm dei to førre gongene, som var i 2006 og 2013. Berre 15 minutt skilde tida på dei to øktene, seier Unni.
Ho fortel at opplegget har vore vellukka begge gongene.
- Eg trur me var rundt 30 personar som las, og mange tok fleire skift.
På spørsmål om kvifor dei gjennomfører ei slik høgtlesing, fortel Unni at dei ynskjer å lyfta Bibelen opp og fram.
- Guds ord er grunnlaget for den kristne tru, og det ynskjer me å vera med å formidla gjennom høgtlesing av Bibelen.
Marit Anmarkrud som er dramalærar ved Solborg folkehøgskule i Stavanger kjem til kyrkja med 11 elevar som skal vera med å dramatisera deler av teksten.
- Me vil svært gjerne ha med oss folk ifrå dei øyane og, me treng så mange som mogleg, avsluttar Unni Østhus.