STAVANGER:
Heile den nye kommune, frå Jørstadvåg i nord til Forus i sør, skal styrast frå dette bygget.,
Men før det skjer skal det gamle rådhuset totalrenoverast. Det betyr mellom anna at bygget som husa både kommunyestyresal, formannskapssal og politikarkontorer skal skrellast reint både innvendig og utvendig.
I spissen for arbeidet står Jørgen Kvæstad Evjen frå Sjernarøy, som er sjef i rivingsavdelinga hos Stangeland med 25 tilsette under seg.
Bonde i tillegg
-Arbeidet går ganske greitt, men det dukkar stadig opp utfordringar som me må takla. Men det er me forberedt på, seier Kvæstad til Øyposten.
Han har fullt ansvar for arbeidet frå A til Å, alt frå å rekna ut anbudet til å oversjå at jobben blir gjort.
-I øyeblikket er dette det største arbeidet me har. Men det er langt frå den største jobben eg har vore borti. Både rivinga av det 25.000 kvadratmeter store meieriet på Nærbø og eit rivingsoppdrag for Nato på Jåttå var større oppdrag enn dette, seier Evjen.
Jørgen Kvæstad Evjen er utdanna sivilingeniør, og pendlar dagleg frå Sjernarøy kor han driv gard i tillegg med 50 kjøtfe og 75 sauer. Akkurat nå har han pappaperimisjon, etter at han og sambuar Eileen Rag Norheim fekk sonen Rasmus.
Og som ikkje det er nok, er han i full gang med å byggje ny løe frå eigen skog. Heldigvis har han fått god hjelp frå nabolaget, og i helga kunne ein del av dyra flytta inn i den delen av løa som foreløpig er ferdig.
Mange vil sjå
Rådhuset i Stavanger ligg midt i bykjernen, og oppmerksomheten om arbeidet er stor. Stadig er det folk innom, som vil sjå. Det nye rådhuset skal vera ferdig i 2024, er planen, og har foreløpig ein prislapp på 400 millionar kroner.
-Det er klart det er kjekt å jobba med eit prosjekt som det er så mykje fokus på, seier Evjen.
Sjølve rivingsarbeidet går greitt nok.
-Men logistikken tek enormt med tid. Alt må kildesorterast, frå asbest til rein og urein betong og ee-avfall. Det betyr at mykje må lagrast i bygget i påvente av å bli kasta, for me har bare to kontainarar til disposisjon. Tomta er nemleg knøttlita, og har ikkje plass til meir, seier rivingssjefen.
-Dukkar det opp mange hemmeligheter eller sjelett i skapa?
-Litt småting finn me alltid, men ikkje det store. Mykje av inventaret i bygget skal tas vare på og skal brukast i det nye bygget. Til og med handtaka på vinduene skal brukast igjen, forklarer Evjen.
Også Misjonskyrkja
Ei ekstra utfordring er det at rivingsprosessen vera utsleppsfri, noko som betyr at det bare blir brukt elektriske maskinar.
-Det er ein stor bonus for dei som jobbar med rivinga, sidan dei dei slepp å jobba i eksos, seier Jørgen Evjen, som elles ikkje bare har rivinga i rådhusert å passa på. Også rivinga av Misjonskyrkja i nabolaget, kor det skal byggast ny høyblokk, er hans ansvar.
-Det er mykje på gang i byen. Det er bra, for det vitnar om stor aktivitet. På det meste hadde eg fem prosjekt på gang i Stavanger sentrum som alle låg i gåavstand til kvarandre, seier han.