Brukthandel og bakst ga klingane mynt i kassen til Madagaskar

Bruktmessa i Fleirbrukshallen på Finnøy laurdag sette ny rekord. Heile 42.600 kroner kom inn til aksjonen «Med hjerte for Madagaskar».

FINNØY: -Eg er strålande fornøyd, og meir enn det, seier initiativtakar til bruktmessa, Ylva Jacobsen til Øyposten.

Ho rettar ein stor takk til alle som har bidratt med brukte lopper, gevinstar til loddsal, baking av gjærbakst og Fleirbrukshallen som stilte lokalet til disposisjon.

-Eg reknar med det blir ny bruktmesse neste år, slår Jacobsen fast.

Mange var tidleg ute då dørene åpna klokka 12 på laurdag, for dei gjævaste loppene går fort unna. Det var både klær, ymse pyntegjenstandar og lekkert bakverk til sals, alt til inntekt for Madagaskar.

Blant dei som hadde rydda frå kjellar til loft, pluss i garasjen, var Tina Nådland, sjefen på Innbyggartorget på Rennesøy. Ho hadde masse lopper ho gjerne ville bli kvitt.

-Eg elskar gjenbruk, seier Nådland.

Ho fekk med seg mannen til ryddeprosjektet, og det resulterte i både klær, ryggsekker, bilete og mykje anna.

-Det er flott viss andre kan få nytte av det me ikkje brukar lenger, seier Tina Nådland.

Jostein Hølland frå Ombo syntes han hadde gjort eit kupp, for han fann to lampeskjermar som han trudde kunne passa fint på to lampettar han har heime.

– Det er to eldgamle lampettar, som ein gamal lærar frå Øvre Espedal har skore ut. Dei er dekorerte med ein fin geitebukk, og eg har ikkje sett maken til dei nokon stad, seier Hølland.

Emma Leavy viser ein flott kjole ho har tenkt å selja.

-Eg skulle brukt den på skuleball, men så kom koronaen, og då blei det ikkje noko av. Nå kan kanskje nokon andre få glede av kjolen, seier ho.