Gir seg etter 30 år i skulen, no ventar nye oppgåver

Etter eit «heilt liv» i skulen, skifter Solveig Mjølsnes Hatletvedt (56) beite, og går til leiarjobb i kyrkja.

Solveig Mjølsnes Hatletvedt blir ny kyrkjeverje i Randaberg.
Publisert: Publisert:

FINNØY: Om få månadar overtek ho stillinga etter ein annan finnøybu. Ho blir den nye kyrkjeverja i Randaberg og avløyser Erik Rørtveit som skal tilbake til prestestillinga i Ofoten. Ho byrjar i stilling 21. mars.

– Eg er kome dit hen at skal eg prøva noko nytt, noko annleis, må det bli no. Dette er liksom litt siste sjanse. Etter eit langt arbeidsliv i skulen blir det spennande å byta beite fullstendig, fortel Solveig.

Ho er utdanna allmennlærar med grunnfag i kristendom og musikk, med tilleggsutdanning i leiingsfag, rettleiing og musikk. Ho har tidlegare vore rektor på Ombo oppvekstsenter. I dag jobbar som avdelingsleiar på Sentralskulen.

Kyrkjeleg erfaring

– For lenge sidan søkte eg den same stillinga i Finnøy, etter at Helga Hebnes gav seg som kyrkjeverje. Eg fekk jobben men takka nei, ettersom eg akkurat hadde byrja på Sentralskulen.

Sjølv om Solveig ikkje har jobba i kyrja tidlegare er det ingen ukjent arena . Ho har vore både medlem og leiar av soknerådet på Finnøy. I tillegg har ho vore med å laga trusopplæringsplanen i kyrkja.