-I solidaritetens navn, ja til eigedomsskatt

Kommunestyret i Nye Stavanger vedtok i ettermiddag at det skal vera eigedomsskatt i heile den nye kommunen, også i Rennesøy og i heile Finnøy frå 2021. I solidaritetens navn er dette rett og nødvendig, sa Ottar Sandanger (Ap) frå talarstolen. 

Ottar Sandanger (Ap) debuterte på talarstolen i Nye Stavanger med eit varmt forsvar for eigedomsskatten.
Publisert: Publisert:
Denne artikkelen er over fire år gammel

-Det gir ingen meining at ei uføretrygda dame i Stavanger skal betala eigedomsskatt mens folk i Rennesøy og Finnøy skal sleppa, sa Rødts Mimir Kristjansson under debatten i kommunestyret i ettermiddag.,

Fleirtalet gjekk som venta inn for at det skal innførast eigedomsskatt i heile den nye kommunen frå 2021.

Det blei også bestemt at kommunen skal delast inn i soner, basert på omsetningsverdien av eigedommane. Sonane skal fastsetjast av ei eiga nemnd.

Neste år blir skatten som i dag, bortsett frå at grunnlaget for skatten skal reduserast med 30 prosent. Rennesøy vil sleppa eigedomsskatt også neste år.

I avtalen mellom Finnøy, Rennesøy og Stavanger heiter det at bare områder utbygd på "bymessig vis" skulle ha eigedomsskatt. I Finnøy og Rennesøy har det vore ei vanleg oppfatning at det galdt Vikevåg og Judaberg. Resten skulle sleppa.

Rennesøy-ordførar, og varaordførar i Nye Stavanger, Dagny Sunnanå Hausken, la ikkje skjul på at dette hadde vore ei vanskeleg sak for henne.

-Ingen er glade i skatt, og Rennesøy har ikkje hatt eigedomsskatt før. Men kven skal setja grensa for kor Vikevåg og Judaberg sluttar, det er umulig, sa Sunnanå Hausken.

Aps Ottar Sandanger debuterte på talarstolen i kommunestyret, og snakka varmt for eigedomsskatt i den nye kommunen.

Sandanger viste til situasjonen i Finnøy kommune,som har eigedomsskatt i dag.

-Eit viktig potensiale var dei 800-1000 hyttene og fritidshusa, som me lenge hadde leita etter muligheter å få inntekter frå. 40 prosent av eigedomsskatten i Finnøy stammar frå desse. Det same argumentet gjeld også for at det er rett og nødvendig å skriva ut eigedomsskatt i heile den nye kommunen, i solidaritetens namn, sa Sandanger mellom anna.

Høyres Elin Schanche meinte derimot at det er viktig å halda ord, og viste til at store deler av Rennesøy og Finnøy var lova å sleppa eigedomsskatt.

-Dette var ei viktig sak i Rennesøy, og å la dei sleppa eigedomsskatt vil ikkje bety meir enn 0,86 promille av driftsbudsjettet. Det skal me fint klara, sa Schanche.

Høyre og KrF gjekk inn for at Nye Stavanger skulle stå på intensjonsavtalens formulering om at det i Rennesøy og Finnøy bare skal vera eigedomsskatt i områder "utbygd på bymessig vis", mens Frp sa nei til eigedomsskatt i heile Nye Stavanger.

Publisert: