Både torsdag før jul og onsdag i romjula var det kraftig vind som gav diverse problem for fly, båt og straumforsyning.
Frå søndag ettermiddag til måndag morgon blir det igjen meldt fare for kraftige vindkast i Ryfylkebassenget, om enn ikkje på like høgt farenivå som tidlegare i jula.
Søndag er nyttårsaftan, så då er det spennande korleis forholda blir for å skyte opp rakettar.
Søndag klokka 20 skal det blåse stiv kuling frå aust med opp til 24 sekundmeter i kasta, ifølgje Yr. Det er truleg i overkant av kva som er tilrådeleg for å skyte opp rakettar.
Fram mot midnatt skal vinden roe seg til frisk bris med opp til 16 sekundmeter i kasta, som er meir innafor etter det Øyposten skjønnar etter å ha prata med folk i bransjen.
Den gode nyheita, etter som varselet ser ut laurdag ettermiddag, er at det på årets siste kveld skal bli opphaldsvær og eit par, tre plussgrader.
