SJERNARØY: Strikking er «in» i tida, som så mykje anna «heimeavla», men kvinnene på Sjernarøy var forut for si tid. Alt i 2005 begynte dei med «strikkekafe» i eldresenteret på Aubø, og har sidan halde det med ei samling i månaden. Initiativet er det «Saniteten» om tok.,
I tillegg er det håndarbeidskafe og drøsekveld for menn. også det ein gong i månaden. Arrangør er Sjernarøy husflidslag.
Denne tysdagen står lappar, kake og kaffi på menyen.
-Det er både sosialt, kjekt og nyttig, meiner kvinnene som har samla seg i sofagruppene på eldresenteret. Denne kvelden er dei ni, men talet på deltakarar varierer, kanskje er det så få som fem, men det har også vore opptil 20.
-Her kjem vel alt nytt som har skjedd sidan sist på bordet?
-Ja, me får vita alt, smiler gjengen til klirringa frå strikkepinnane.
Strikketøyet består av alt mulig, frå sokkar til gryteklutar og klær til barnebarn.
-Det hender ogå at me ikkje har «ånden» til å spøta, og bare treffest for å snakka, seier Ebba Marie Breivik.