Kiwi får låne bakhagen til festdag
Laurdag blir det aktivitetar og hyggestund utanfor både Kiwi og Coop på Finnøy.
Laurdag 6. mai inviterer Coop Finnøy og Øyposten til vårslepp på Judaberg kai, som Øyposten tidlegare har omtala. Òg Kiwi i Fåhagen steller til fest same dag.
– Me har fått låne det store plenarealet bak butikken, seier butikksjef Marianne Slåtten Mikkelsen i Kiwi:
– Me samarbeider med speidarane Finnøy-Talgje og har forskjellige uteaktivitetar. Det blir godt å vere ute ein dag.
På programmet står blant anna gratis pølser, kaffi og brus, hoppeslott og raust med premiar.
Under Coop sitt arrangement på Judaberg kai blir det blant anna stilt ut bilar og båtar. Her blir det lova gratis is så lenge lageret rekk, så laurdag er det godsaker å hente både her og der.
Værvarselet er i skrivande stund det aller beste. Laurdag skal det bli 15 grader og opphaldsvêr med gult farevarsel for skogbrannfare, ifølge Yr.no.
