Så fort skulen var ferdig fredag rykka Normisjon og ein stor gjeng frivillige inn for å gjere om Finnøy fleirbrukshall til messehall for den tradisjonsrike Julemessa på Finnøy.
– Me håpar at det kjem nokre hundre i morgon. Kan hende 400 til 500 spreidd utover dagen, seier julemesseleiar Unni Vignes.
Fredag klokka 16 var det hektisk aktivitet i hallen. Bord, stolar og lydutstyr skal opp. Diverse julevarer, husflid og gevinstar skal danderast ut over.
Øydis Antun jobbar som frivillig med å få ting på plass. Ho har òg laga nokre småting, kjem det fram.
– Eg har strikka sokkar og sittunderlag. Og ein vest og litt forskjellig, fortel Øydis.
Messa opnar laurdag klokka 10.00. Inntektene går til hjelpearbeid og misjon i Senegal.
Laurdag startar òg julesesongen for Juleløå i Lauvsnesvegen 78, rett oppe i bakken. Ikkje nok med det. På Bru er det julemesse laurdag, medan det både laurdag og søndag er julemarknad utanfor Utstein kloster.
