Stiller spørsmål ved om prosedyre for akuttbil er lovleg

Varaordførar Dagny Sunnanå Hausken reagerer på at akuttbilen på Judaberg aldri skal kunne brukast til Talgje eller Rennesøy.

– Ifølgje helsepersonellova har helsepersonell plikt til å yte øyeblikkelig hjelp, seier varaordførar Dagny Sunnanå Hausken.

Ho er sjølv utdanna sjukepleiar og reagerte då ho las i Øyposten om at Stavanger universitetssjukehus har stramma inn praksisen for ein akuttbil ved ambulansestasjonen på Judaberg. Bilen skal berre brukast ved akutte situasjonar på sjølve Finnøy, står det i prosedyren som leiinga i ambulanseavdelinga har børsta støv av.

– Akuttbilen frå Judaberg kjem 10 til 15 minuttar raskare fram til Talgje eller Østhusvik enn ein ambulanse frå byen. Då kan det handle om liv eller død, seier Hausken.

I helsepersonellova står dette om øyeblikkeleg hjelp:

«Helsepersonell skal straks gi den helsehjelp de evner når det må antas at hjelpen er påtrengende nødvendig.»

– Eg kjem til å ta opp denne saka i formannskapet torsdag 28. september, seier Hausken:

– Eg vil spørje administrasjonen om prosedyren for akuttbilen på Judaberg er lovleg. Viss bilen har forbod mot å køyre til Talgje eller Østhusvik for å gi livreddande hjelp, så høyrest det merkeleg ut.