Ny sjef for frivilligheten i Rennesøy: -Ynskjer at folk tek kontakt
Mandag denne veka blei den nye leiaren for Rennesøy Frivilligsentral hjarteleg motteken med super banankake av avtroppande leiar Bjørg Vestbø.
RENNESØY: -Har du nokre råd til din etterfølgar, lurer Øyposten på.
-Nei, eigentleg ikkje, svarar Bjørg Vestbø.
-Han skal få begynna med blanke ark, og finna sin eigen veg. Eg skal ikkje leggja meg opp i arbeidet hans, slår Bjørg fast, som nå går over i pensjonistane sine rekkjer.
Etter 16 år som leiar av frivillighetssentralen, gir ho seg, og Kim Tysse Ingebrigtsen, opphavleg frå Narvik, er klar til å hoppa inn og «ta taumane».
Verdas kjekkaste jobb
Med seg i bagasjen hadde Ingebrigtsen ein fin tulipan-bukett, som den avtroppande leiaren blei veldig glad for.
-Dette er verdens kjekkaste jobb, slår Bjørg fast, som er bedt om å stå i jobben ut januar for å gjera overgangen så smidig som mulig.
Det er vel 30 lag og organisasjonar i Rennesøy, som den nye leiaren av frivillig-sentralen får med i sin portefølge.
Kim Tysse Ingebrigtsen har jobba tre år i Midtre Hålolgaland Friluftsråd, i ei prosjektstlling.
-Der hadde eg mykje med barn- og unge å gjera, og har vore med og tilrettelagt gode møteplassar i friluftslivet. Er det nokon som har innspel eller treng hjelp for eksempel til søknader, er det bare å ta kontakt, seier Ingebrigtsen, som gledar seg til å begynna.
Kan koka grøt
Han har kone frå Klepp, og dei har nå busett seg i Randaberg.
-Kor godt kjenner du Rennesøy?
-Ikkje så veldig, men eg har kjørt litt rundt for å gjera meg litt betre kjent, seier Kim, som ser for seg å bruka mykje tid med Bjørg og lytta til hennar erfaringar.
-Det blir spennande å sjå kva me kan få til saman med lag og foreningar i kommunedelen, seier Kim Tysse Ingebrigtsen.
Ein viktig del av jobben er å spandera julegrøt, og det trur Kim at han skal klara heilt fint.
-Eg laga nissegrøt for familien 22. desember, opplyser han.
