Kunstgrasbanen i Vikevåg skal rehabileterast

Stavanger kommune vil fiksa opp kunstgrasbanen i Vikevåg i løpet av sommaren.

RENNESØY: Ekstraordinært store mengder fiber losnar frå kunstgrasmatta i Vikevåg, noko som lagar store sår i matta og fylgjer med spelarar og brukarar ut av banen. Fotballforbundet i Rogaland meiner det er ei «tikkande miljøbombe».

Nå vil Stavanger kommune ta tak io problemet, lovar idrettsjef Arne Tennfjord i Stavanger kommune.

-Banen er utgått på dato, og me kjem til å fjerna den gamle kunstgrasmatta og sende henne til resirkulering, opplyser Tennfjord til Øyposten.

Planen er å gjera det til sommaren, når det er tørrast og best vêr.

-Men først må me undersøkja korleis grunnforholda til banen er, før me legg på ny kunstgrasmatte, legg Tennfjord til.

-Kjem det til å bli dyrt?

-Det vil nok kosta nokre millionar kroner, men me håpar å få spelemidlar til dette, seier han.

Fotballforbundet i Rogaland tilrådde også at banen blei stengd for skulen, men det ser ikkje Tennfjord noko poeng i.

-Skuleelevar har ein annan bruk av banen enn seriekampar, meiner han.