Dorrit Vignes er valt inn i bispedømerådet

Finnøybu Dorrit Vignes er valt inn som eitt av sju leke medlemmer i Stavanger bispedømeråd.

Resultatet frå valet til Stavanger bispedømeråd er klart. Her er dei sju leke medlemmene som går inn i rådet:

• Helene Breivik Hellerdal, Åpen folkekirke
• Brit Nelly Ness Tveit, Nominasjonskomiteens liste
• Therese Egebakken, Frimodig kirke
• Magne Hersvik, Bønnelista
• Dorrit Vignes, Åpen folkekirke
• Kristine Brunvathne Bjerkestrand, Nominasjonskomiteens liste
• Eirik Faret Sakariassen, Åpen folkekirke

– Veldig stas. Eg ser fram til arbeidet, seier finnøybu Dorrit Vignes til Øyposten.

Krevjande fellesskap

Vignes har lagt ut denne utdjupande kommentaren på Facebook:

«Noko av det fine og krevjande med Den norske kyrkja er spennet i medlemsmassen. I kyrkjebenkene har ein dei som får gåsehud av orgelspel, og dei som får allergisk stresseksem av same musikk. Dei som bruker kyrkjebygget som sin andre heim, og dei som sjeldan er der. Dei som bed til Gud i smug, og dei som frimodig forkynner trua. Dei som får vondt i magen av regnbogeflagg, og dei som kjenner tryggleik av å sjå same flagget i Kyrkja.

Og alle menneska i mellom, som ikkje fell inn i nokre av kategoriane skissert opp her. Det er både eit godt og slitsamt fellesskap. Litt som familiar ofte er. Eg gler meg til å representere dette flotte – og til tider krevjande – fellesskapet.»

Vignes stod som nummer to på lista til Open folkekyrkje, og denne organisasjonen fekk inn tre medlemmer. Vignes har i inneverande periode vore soknerådsleiar i Hesby sokn, og ho er òg valt inn i det nye soknerådet.

Ti til saman

Forutan dei sju leke har Stavanger bispedømeråd desse medlemmene:

• Lek kirkelig tilsett: Jarle Stokka (valt av dei tilsette)
• Prest: Dag Tormod Milje (valt av prestane)
• Biskop Anne Lise Ådnøy er fast medlem i bispedømerådet og sto ikkje på val.

Landets elleve bispedømeråd utgjer det årlege Kyrkjemøtet, som er det øvste organet i Den norske kyrkja.

Her er resultatet frå valet av leke medlemmer til Stavanger bispedømeråd: