FINNØY:
-Det er ikkje lenger nokon finansieringsplan for dette prosjektet, seier samferdselssjef Gottfried Heinzerling til Øyposten, etter at Frp og regjeringa blei enige om at det ikkje skal vera bompengar i Finnfast frå 1. juli.,
Ifølge Heinzerling var planen til Rogaland fylkeskommune å senda ein søknad til Stortinget rett over ferien om å forlenga bompengeinnkrevinga i Finnfast for å betala gang- og sykkelvegen. Planen var at innkrevinga skulle forlengast i åtte månader, for at bilistane skulle betala 25 av dei 30 millionane som bygginga kostar.
-Nå må Stavanger kommune be om at prosjektet kjem inn på rulleringa av fylket sin investeringsplan, seier Heinzerling.
-Betyr det at prosjektet blir forsinka?
-Ja, det trur eg. Kor mykje kjem an på kor høgt dette prosjektet blir prioritert i forhold til andre investeringar som fylket har på gang.
-Er det ein mulighet at Stavanger kan forskuttera prosjektet?
-I prinsippet, ja, svarar Gottfried Heinzerling.
Planen var at Stortinget skulle behandla søknaden før jul eller i vinter, slik at bygginga kunne ha starta om eit år.