Tidlegare i vinter har Statens vegvesen ved fleire høve delt ut gebyr når dei har kontrollert beltebruk i bussar gjennom kontrollstasjonen på Sokn. Ein busspassasjer som blir tatt utan sikkerheitsbelte, har måtta betala 1500 kroner.
Torsdag 2. mai hadde Vegvesenet ein ny beltekontroll, men då var det meste i orden.
«Det ble kontrollert bruk av belte i to busser. Her var det totalt 31 passasjerer og alle passasjeren brukte beltet», skriv Vegvesenet i ei pressemelding.
Elles kontrollerte Vegvesenet tunge køyretøy og såg særleg på reglane for køyre- og kviletid. Her er det som blei avdekka:
Sju av tolv førarar hadde manglar ved køyre- og kviletida. Fleire fekk skriftleg åtvaring, medan ein bil fekk 1000 kroner i gebyr til førar og 2000 kroner til føretaket.
Ein traktor med tilhengar hadde gods som stakk ut bak på tilhengaren. Dette måtte merkast før traktoren fekk køyra vidare.
Eit utanlandsk køyretøy mangla vognkort.
Eit køyretøy hadde ikkje sikra lasten godt nok.
Eit køyretøy mangla dokumentasjon for å driva transport. Føretaket fekk 6000 kroner i gebyr.
Eit køyretøy hadde ikkje betalt avgift for trekking av tilhengar. Skattemyndigheitene er varsla.