Forhandlar om posisjonar
Borgarleg blokk reknar med å bruke litt tid for å bli einige om posisjonar og politisk plattform.
– Me kjem nok til å trenge i hvert fall ei veke, seier gruppeleiar Henrik Halleland i Kristeleg Folkeparti:
– Masse posisjonar skal fordelast, blant anna til elleve kommunedelsutval. Mange personar skal kontaktast, og dei må få litt tid til å tenke seg om.
Siste frist for å ha alt på plass for det politiske skiftet i Stavanger er til kommunestyremøtet måndag 23. oktober.
Felles plattform
Dei fem partia på borgarleg side, som har vore fire år i opposisjon, får 34 av 67 mandat i det nye kommunestyret, akkurat nok til å ha fleirtal.
– Me har levert felles budsjettforslag dei to siste åra, så me skal nok rimeleg greitt bli einige om ei politisk plattform, seier Halleland.
Høgre er dominerande parti med 21 av 34 mandat i den borgarlege blokka. Ny ordførar blir difor etter alle solemerke Sissel Knutsen Hegdal. Ho har hytte på Nord-Hidle, så ho kjenner i det minste farvatna i Ryfylkebassenget.
Lange dagar
Etter at valsigeren blei slått fast tysdag kveld, blir det meldt om god stemning på borgarleg side. Tor Bernhard Harestad i Framstegspartiet skildrar det slik:
– Me har ein gysjeleg god tone i gjengen. Det er kjempefolk å vere i hop med:
– Eg har bare godt å sei om Kari, men Sissel kjem òg til å bli ein kjempegod ordførar, legg Harestad til.
Henrik Halleland fortel at personkjemien er bra, men legg til at det ikkje berre blir smil og flir framover.
– Me må gjennom nokre tøffe diskusjonar, men sånn er det i slike forhandlingar. Me jobbar frå tidleg morgon til sein kveld nå, seier Halleland.
Frps gruppeleder Leif Arne Moi Nilsen seier til Stavanger Aftenblad at han ikkje blir varaordførar i Stavanger. Sannsynleg er Halleland ein svært aktuell kandidat til den jobben.
Tabell som viser resultatet frå kommunevalet i Stavanger. Dei to kolonnene for endring viser endring i prosentpoeng og endring i talet på mandat i kommunestyret i høve kommunevalet i 2019:
| Prosent | Endring (pp) | Mandat | Endring | |
|---|---|---|---|---|
| Arbeidarpartiet | 33,8 | +8,4 | 22 | +4 |
| Høgre | 27,8 | +4,7 | 21 | +5 |
| Framstegspartiet | 8,5 | -0,4 | 6 | 0 |
| Kristeleg Folkeparti | 5,1 | +0,7 | 3 | 0 |
| Sosialistisk Venstreparti | 4,3 | -0,5 | 3 | 0 |
| Venstre | 4,2 | -0,5 | 3 | 0 |
| Rødt | 3,6 | -1,8 | 3 | -1 |
| Industri- og Næringspartiet | 3,2 | +3,2 | 2 | +2 |
| Miljøpartiet De Grønne | 2,9 | -3,6 | 2 | -2 |
| Senterpartiet | 2,5 | -2,2 | 1 | -2 |
| Pensjonistpartiet | 1,0 | -0,7 | 1 | 0 |
| Folkets Parti | 0,5 | -8,7 | 0 | 6 |
