Runes tips til korleis lage noko sterkt av bjørnebær
Bjørnebær kan òg brukast som base for ein prima julelikør.
Laurdag hadde Øyposten stand på Rennesøydagen der me hadde dekorert bordet vårt med ein kvast bjørnebær. Dekorasjonen fekk Rune Nordbø frå Mosterøy til å kome med ei god oppskrift.
– Av bjørnebær kan du lage ein nydeleg likør, fortel Rune:
– Fyll eit to liters norgesglas med bjørnebær. Ha på sukker i mellomrommet mellom bæra, og ha til slutt 60 prosent til toppen av glaset. Skru igjen lokket og snu glaset kvar dag i to veker.
Så kjem eit viktig punkt.
– Glaset må ikkje opnast før jul, seier Rune:
– Kvaliteten blir mykje betre når likøren får stå ei tid og modnast.
Mengda sukker tilpassast etter smak. Rune likar det best at det ikkje er for søtt, fortel han.
