Har 630 knollbegonia i hagen

Anne Britt Helle Mjølsnes har heile 630 små knollbegonia i hagen. Ho ser si oppgåve å føra vidare hagen på Mjølsnes i stilen til svigerfar, avdøde Bjørn Mjølsnes, men prøver å forenkla.

Anne Britt Helle Mjølsnes med nokre av dei 630 små knollbegoniane ho har i hagen. -Du må koma igjen i august når dei blomstrar, det er då dei er flotte, seier ho. Det skal me.
  • Rune Nedrebø
Publisert: Publisert:
Sverre Emil Mjølsnes er fascinert av stein, og viser meir enn gjerne fram denne staselege «bautasteinen» som han har reist i hagen.

FINNØY: Hos ekteparet Anne Britt Helle Mjølsnes og Sverre Emil Mjølsnes, blomstrar hagegleda bokstavleg talt.

Den store innhaldsrike og fargerike hagen, kanta av store bøketre, tek det eit par timar å klyppa med motorklyppar av den «gamle sorten». Ein flott hagedam blir forsynt med bekkevatn som kjem heilt ovanfrå frå heia.

Heldige dei som har ein fin hagedam. Det har Sverre Emil Mjølsnes og Anne Britt Helle Mjølsnes i hagen sin på Mjølsnes.

Dessutan er det ikkje mindre enn tre staselege, smale hellesteinar ulike stader i hagen, sett på høgkant. Den største, ved inngangen til tunet, ragar tre-fire meter over bakken.

Ved dammen står ein annan, og ser du godt etter ser du tydeleg trekka av ein «hagenisse».

-Det vare mange slike heller i utmarka vår. Mellom anna er dei brukt som heller over hevdaskuten i løa, seier Sverre Emil Mjølsnes.

Hagenissen ved dammen.

Ved huset står eit majestetisk «apeskrekk», og i hagen blir det dyrka roser, tulipanar, gule og raude bringebær, hageblåbær, rabarbra, silkepeoner, bondepeoner, trepeoner og fuksia, for å nemna noko. Og ikkje minst 630 små knollbegonia.

-Dei tek ikkje sneglane, forklarer Anne Britt Helle Mjølsnes. Ho er opphavleg frå Vennesla, og søster til Sølvsmeden på Finnøy, Folke Helle, som har sølvsmia si like i nabolaget.

Ei drueranke må tynnast skal ho gi god frukt, seier Sverre Emil Mjølsnes, som har lært korleis ho skal stellast av Jostein Gard på Talgje.

Dyrking av knollbegonia var noko ho arva etter svigerfaren, Bjørn Mjølsnes, som hadde endå fleire.

-Eg prøver å forenkla det litt, og lagar til store bed, seier ho.

Dei raude blomstene, som er gule i midten, synes ho lyser fint opp i hagen.

Litt av poenget med begonia er å få dei tidleg i blomst. Knepet Helle Mjølsnes brukar der er å potta dei i små potter med god jord, og driva dei fram i drivhuset. Også fuksiaene har ho arva frå svigerfaren.

Drivhuset er elles eit kapittel for seg sjølv, og bugnar av blomster. Ei kraftig vinranke veks i heile lengda på huset.

-Det blir mykje gode druer, men det er viktig å tynna vinranka skal du få fine druer. Maks to klasar per grein, ifølge Jostein Gard. Og han trur eg på, slår Sverre Emil Mjølsnes fast.

  1. Finnøy