Simen skal skrive bok om Arnold B Family – og lagar sommarquiz i Østhusvik

Torsdag 27. juli blir det quiz og musikk på Fjordbris hotell.

Simen Ingemundsen stiller som quizmaster og John R. Almås som trubadur når Fjordbris hotell i Østhusvik inviterer til arrangement torsdag 27. juli.

Ingemundsen er til dagleg journalist i nettavisa Randaberg24, som er eit dotterselskap til Øyposten AS. Han seier dette om quizen:

– Det blir ei pakke med minikonsert, musikkquiz og ein vanleg allmennquiz:

– Me kallar programmet «Quiz og musikk med to karer så aldri går aleina», seier Ingemundsen.

Bok om kristenpop

Han har solid erfaring som quizmaster frå puben på Randaberg. I tillegg til quiz og journalistikk har han til nå gitt ut fire krimbøker saman med ein kamerat. Når han går ut i sommarferie i starten av august skal han starte på si første sakprosabok, fortel han:

– Eg skal skrive ei bok om Arnold B Family med arbeidstittel «Du løfter meg opp».

Gjennom såkalla fundraising på nettsida bidra.no har han så langt samla inn 75.000 kroner til prosjektet, som er meir enn nok til å bli utgitt på Falck Forlag AS.

Musikalsk fenomen

Arnold B Family er ei norsk kristen song- og musikkgruppe med medlemer frå familien Arnold Børud. Dei har nådd vidt ut med heimelaga gospelmusikk og gladpop.

– Mor mi vogga meg til Børud-musikk, så eg er vaksen opp med dette, seier Ingemundsen.

Randabergbuen betegnar seg sjølv som kristen, utan at han har profilert seg så veldig som det:

– Eg kan vel sei så mykje som at boka om Arnold B Family ikkje blir den siste eg kjem til å skrive om kristen musikk.

Under quizen på Fjordbris hotell lovar han eit breitt spekter av emne.

– Eg har lært så pass at folk vil ha spørsmål om meir enn eitt tema, så det blir mykje forskjellig, seier Ingemundsen.