Musikalsk påskemeditasjon i Utstein Kloster

Hymns of compassion er ein konsert som får deg til å senka skuldrene og kjenna igjen gamle melodiar kombinert med ny musikk.

RRENNESØY: Øyvind Kristiansen og Jonas Kilmork Vemøy har kunstnarisk utgangspunkt og tilhald i Kulturkirken Jakob i Oslo og Jakobmessene som vert feira der.

Konsertane dei spelar i 2023 er basert på albuma deira «Hymns of Compassion» og «Hymns of Longing», frå 2021 og 2022, og har fokus på pasjonstida sin kamp og liding.

I år spelar duoen konsertar i Tyskland, Danmark og Norge, både kyrkjekonsertar og i konserthus, på festspel og festivalar. 3. april kjem dei to til Utstein Kloster.

– Den musikalske estetikken til Kristiansen og Vemøy er ei blanding av sakral musikk med vekt på gamle salmar og hymner, og ambient elektronika – med piano og trompet som base, og der lyden av fortid og notid møtast i eit dynamisk lydlandskap med meditativ grunnstemning, skriv Kirkelig Kulturverksted.

Samarbeidet mellom Kristiansen og Vemøy har vekse fram gjennom arbeidet med «Jakobmessene» i Kulturkirken Jakob. Her lagar dei meditasjonsmusikk rundt kyrkja sin tekstsyklus, med farge og inspirasjon frå ei rekke sjangrar som spenner frå tradisjonell kyrkjemusikk til jazz- og improvisasjonsmusikk.

Konserten er eit samarbeid mellom Rennesøy og Mosterøy menigheter og Rennesøy Kulturhus.