Dickins og Coop’en saman om stor påskefest på Finnøy

Pub’en Dickins og Coop’en går saman om å arrangera stor påskefest på Judaberg i påskeveka med eige kulturtelt.

FINNØY: Pub’en og restauranten Dickins og Coop’en ladar opp til stor festveke i påsken på Judaberg. Mellom anna blir det sett opp eige kulturtelt, sponsa av Dickins og Coop’en i hagen framfor pub’en, med scene, fast golv og varme i teltet. Det er her dei fleste av arrangementa skal foregå.

-Me vil laga liv og røre på Judaberg i påskeveka saman med Coop’en, og eg håpar at både finnøybuar, andre øybuar og hyttefolk vil slutta opp om arrangementa, seier Stephan Dickinson til Øyposten.

Festveka begynner alt fredag kveld 31. mars på Dickins klokka 19.30. Då kjem globetrottaren Jørn Bjørn Augestad for å snakka om si nye bok «Prosjekt Grenseløs En reise til land som ikke er land». Det blir gratis inngang. Augestad har besøkt over 60 land, som ikkje er land, og boka hans om reiseopplevingane er nettopp komen ut.

Svingande musikk

Palmelaurdag 1. april klokka 20.00 blir det konsert med europameister i blues, Eric «Slim» Zahl i kulturteltet. Eric «Slim» Zahl er vinnar av European Blues Challenge 2016 og er også nominert til Spellemannsprisen for hans drivande blues, rock´n roll og svingande musikk.

Eric «Slim» Zahls ambisjon er å vidareføra lyden av 50-talet, framført med dagens fart og futt. Bluesartisten mottok i 2017 Stavanger Kommunes Kunstnerstipend for sitt arbeid, og har spelt på nokre av dei største bluesfestivalane i Norge, i tillegg til fleire større festivalar i Europa .

Slimm’en og Eggebø Spanne

Han har også spelt på klubbar som B.B. King´s Blues Club og Alfred´s på Beale Street i Memphis, TN og Aint Nothin´ But og Blues Kitchen i London.

Eric «Slim» Zahl har gitt ut to album saman med bandet The South West Swingers.

Onsdag 5. april, også det klokka 20.00 i teltet, dukkar han opp igjen, nå saman med Finnøys eiga Svanhild Eggebø Spanne til ein felleskonsert. Då er det duka for eit spennande møte mellom dei to artistane, med Svanhild Eggebø Spannes klokkeklare stemme saman med den rocka bluesartisten Eric «Slim» Zahl. Arrangøren lovar ein «garantert vakker og koseleg» kveld.

Etter konserten blir det ein uhøgtideleg musikkquiz kor «»Slimm’en» er quiz-meister. Dessutan er det lova flotte premiar.

Familiedag med humor og hamburger

Påskeaftan 8. april klokka 11.00 arrangerer Coop’en familiedag på Judaberg, kor det mellom anna blir gratis hambuger og pølser. Det blir også Finnøy-quiz med Finnøypodden, og humor med Arne Nordbø. Premie til vinnarlaget blir gratis middag på puben Dickins. Påmelding på Facebook.

Pub’en har også fått softismaskin i bua utfor, som skal vera klar til familiedagen.

1. påskedag 9. april klokka 20.00 kjem ein av Stavangers mest erfarne trubadurar på besøk til kulturteltet på Judaberg. Jim Jacobsen er ein allsidig musikalsk entertainer med over 30 års erfaring. Han spesialiserer seg i musikalsk underhaldning, og byr på humor, allsong, show, gode historiar og musikk i dei fleste kategoriar.

I 2020 blei han via oppmerksomhet på Dagsrevyen for at publikum kunne bestilla sine ønskelåtar med QR-kode.