FINNØY:
– Hæ, skal dei legge ned, spør finnøybuen Berit Vangen overraska.,
Ho var på kafèen på fredag med tre venninner, som alle blei overraska over å høyre at den skulle stenge.
– Det er veldig leit, og på så kort tid, seier Vangen.
Grunnen er at matkonseptet til Frode Selvaag og Arne Brimi skal lanseras i barnehagar i utlandet.
Dermed valte Ryfylkekokken å ikkje fornya kontrakten med kommunen for å fortsette drifta av kafèen på Innbyggartorget på Judarberg.
https://www.oyposten.no/2021/10/01/ryfylkekokken-og-arne-brimi-sitt-konsept-blir-globalt/
Lager nytt konsept
Men, det blir nok likevel kafè på Innbyggartorget. I ein eller anna form.
Stavanger kommune prøver å få på plass eit nytt alternativ så snart det er mogleg. Dei skal lysa ut ein anbudskonkurranse for eventuell ny tilbydar, samstundes som dei går gjennom forrige kontrakt for å sjå om det er noko som må endras.
– Me jobbar med saka. Me prøver å få inn ein ny tilbydar på lang sikt. På kort sikt jobbar me med eit spanande konsept me har kalla «Drop-in kafè», som me ynskjer å testa ut. Meir informasjon kjem når konseptet er klart for lansering,
seier Rita Lindås som er innbyggartorgkoordinator på Finnøy, til Øyposten.
Ein «Drop-in kafè» vil i dette eksempelet bety at dei vil ha forskjellige tilbydarar som driv kafèen i korte periodar.
– Me ønsker svært gjerne å ha en kafè for alle innbyggarane her. Me prøver elles å tenke litt kreativt, seier Maiken Saxeide Offerdal som er avdelingssjef for innbyggerdialog.
Landahuset består
Cathrine og Frode Selvaag skal fortsatt driva Landahuset på Finnøy, samt konsulentoppdrag, med meir. Men kafèen som har vore open sidan i fjor haust, er det altså slutt på, for deira del.
Ryfylkekokken sluttar også med catering- og bakerivirksomheit frå nyttår.
– Me gler oss til å levera gode matopplevelser i kafeen fram til stenging. Og til å ta imot gjester på Landahuset i tida fram mot jul. Mat og måltidsopplevelse vil alltid vera viktig for oss.