Fredag inviterte elevane i 5. klasse på Sentralskulen foreldre, besteforeldre og andre klassar til Storsamling i Kulturstova. På grunn av pandemien har storsamlingane vore berre for elevane på skulen dei to siste åra, difor var det ekstra kjekt å kunne invitera gjester igjen.
Henta ekspertise
Og ekstra kjekt var det at Olaug og Edvin Hesby sat i salen. Dei to har vore med og lagt grunnlaget for framsyninga som tok føre seg korleis det var for born å gå på skulen for 100 år sidan. Dei har vore på skulen og blitt intervjua av 5. klassinginane om eigne erfaringar.
Fleire av elevane hadde også intervjua sine eigne oldeforeldre, og spela dei på scena.
– Hadde de pizza på laurdagen? Eller, hadde de fjernsyn? Kva med snop?
Olaug og Edvin fekk mange spørsmål.
At dei i gamle dagar fekk ei appelsin på julaftan, og kanskje eit wienerbrød viss dei var ekstra heldige, det er ikkje lett å forstå for dagens 5.-klassingar.
– Det var veldig kjekt å få vera med på dette, elevane er kjempeflinke, smiler Olaug som sjølv har eit oldebarn blant skodespelarane.
Knallhard disiplin
Dagens elevar har aldri erfart ein slik skuledag som dei så bra formidla på scena. Her ser me den strenge frøkna ta plass ved kateteret med peikestokken, medan elevane finn plassane sine og timen kan byrja. Å stå slik ved pulten til dei får beskjed om å setta seg, syntest å vera nokså fremmand for elevane.
– Du kan ikkje 6-gangen nei, gå i skammekroken og stå der, kommanderte lærarinna.
Det blei heller ikkje sett gjennom fingrane med om det blei litt snakking i klassen.
– Skriv ei sida i kladdeboka med setninga: – Eg skal ikkje uroa i klassen meir.
Mosettingar
Parallelt på scena spelar ein annan gjeng skulekvardagen slik den er i dag. Med cromebook og gangememory. Ein avslappa gjeng rundt eit stort bord som snakkar i munnen på kvarandre. Og ein mild og snill lærar som har stor forståing for at det kan vera vanskeleg å læra seg 6-gangen.
– Ok, eg skal hjelpa. Men husk å øv på gongetabellen heime.
– Å så kjipt, eg får jo ikkje tid å trena, eller spela playstaion.
– Kva er vitsen med å læra gangetabellen?
Heldigvis får ingen eit smekk over fingrane om ikkje 6-gangen sitt som den skal.
Me tykte elevane gjorde ei solid framtoning. Dei var flinke å formidla bodskapen, dei song tidsrette, typiske skulesongar, og dei fekk fram mange gode poeng. Det var lett å førstilla seg korleis skulekvardagen måtte ha vore i 1923.