Etterlyst: Fleire menn til dansepartnarar

Tre menn møtte opp til seniordansen i Kulturhuset Meieriet på Rennesøy torsdag kveld. -Dei skulle vore her i staden for å sitja heime, meiner arrangørane.

RENNESØY: -Dans er himla god trim for kropp og sjel, meiner Anne Lise Gundersen. Det er ho som er instruktør, og på ipad’en ligg plenty av gamle slagarar klar til å ljoma ut i høgtalaren og få dansen i gang.

«Achy Breaky Heart», «Corrine, Corrina», «Danse mot vår» og mange, mange andre.

Før var det også finnøybuar med på seniordansen på Rennesøy, og dei var rett og slett grevlig gode til å dansa, seiest det. Men etter at primus motor der på øya ga seg, er finnøybuane fråverande.

-Men me saknar dei, me håpar dei kjem igjen, seier Bodil Vestbø.

Traff kvarandre på dansen på Østhusvik

Men det kjem folk frå Randaberg på treffet, og rennesøybuen reiser til Randaberg på dansetreff.

For å kompensera for mangelen på menn blir det delt ut raude og blå band til å ha rundt halsen, blå symboliserer menn og dei raude er kvinner.

-Hadde det vore fleire menn kunne me hatt meir pardans. Nå dansar me i ring og skiftar partnar heile tida. Men du skal sjå kor blide og opplagde folk blir når musikken kjem på og dansen er i gang, slår Gundersen fast.

Mellom dei som møter er Martin og Marit Mikkelsen frå Rennesøy.

-Me traff kvarandre på dansen på Østhusvik, seier Martin Mikkelsen.

Han er opphavleg frå Bjørnøy, og derifrå drog dei fleire i lag med motorbåt til dans på Østhusvik.

-Me var ikkje så flinke til å dansa nokon av oss, men me likte veldig godt å dansa, seier han, mens kona skyt inn at han ikkje treng å avsløra alt for mykje frå ungdomstida deira.

-Det var helst vals og tango det gjekk i, for det var det spelemannen med trekkspel kunne, seier Marin Mikkelsen.

Skulle lært av Afrika

Med på seniordansen var også 9. klassingane Angelika Hanasand, Ilsarie Abdulla og Noa Førsvoll. Dei har prosjektet «Innsats for andre» på skulen, og leiar for Frivilligsentralen, Bjørg Vestbø, tok dei like godt med på dansetreffet.

-Det ser ut som dei kosar seg veldig, meiner Noa Førsvoll.

-Er det mykje dansing i dykkar omgangskrets?

-Eg dansar ikkje, seier Noa, mens både Angelika og Ilsarie dansar.

-Me har litt dans på skulen og på fritida. Men det er ein litt annan dans, mykje friare enn dette, seier dei.

Like vel blir dei med når dei blir oppfordra, og svingar seg med seniorane i salen.

-Ungdommen skulle lært litt av afrikanarane, og sett korleis dei gleder seg over sang, dans og rytme, meiner Bjørg Vestbø.