Finnøybedrifter blør etter skatteskjerping
Fordelen som Finnøy har hatt for å bli rekna som ein distriktskommune, blei fjerna frå nyttår. Regjeringa har vedteke å auka arbeidsgjevaravgifta frå 10,6 til 14,1 prosent i kommunedelen, noko som svir for næringslivet i øyane.
FINNØY:
-Dette føyer seg bare inn i rekkka av dårlege nyheter for tida, seier ein oppgitt Jan Terje Vignes i Lauvsnes Gartneri til Øyposten.,
Lauvsnes gartneri har 15 millionar kroner i lønsutgifter, og endringa vil bety vel ein halv million kroner i ekstra utgifter for gartneriet. Dette kjem på toppen av ein svært stressa situasjon med rekordhøge gass- og straumprisar.
- Senterpartiet lova at dette ikkje skulle koma, men det skjedde like vel. Det er klart eg er skuffa, men me har ikkje noko anna val enn å leva med det. Sjølv om det er lite i forhold til dei andre utgiftene, er det ikkje ei hyggeleg melding å få akkurat nå, seier Vignes.
Smell for mange
Også andre Finnøy-bedrifter blør som ein følge av vedtaket. Oppdrettselskapet Grieg må ut med ein halv million ekstra i arbeidsgjevaravgift til slakteriet på Helgøy, fôringssentralen på Finnøy og to oppdrrettsanlegg, Ryfylke Livsgnist reknar med 70.000-100.000 i auka utgifter mens Finnøy og Rennesøy landbrukstenester må ut med halvannan million kroner ekstra, som dei må fakturera bøndene. For Finnøy Økonomi utgjer det 300.000 i meirutgifter, mens Øyposten får ei ekstrarekning på kring 50.000 kroner, opplyser dagleg leiar Kristian Spanne.
I tillegg til Finnøy, går også Vindafjord frå redusert til høgaste sone for arbeidsgjevaravgift. Suldal og Hjelmeland er derimot fortsatt i sone 1 a, og har 10,6 prosent i arbeidsgjevaravgift.
I forbindelse med intensjonsavtalen mellom Stavanger, Finnøy og Rennesøy om den nye kommunen, blei Finnøy lova å få halda fram med 10,6 prosent i arbeidsgjevaravgift. Rennesøy har 14,1.
Foreslått av Erna Solberg
Skjerpinga blei foreslått av Solberg-regjeringa, men vedtatt i Stortinget før jul.
Krf-politikar Henrik Halleland er den politikaren som først oppdaga endringa, og som alarmerte Øyposten om saka. I eit spørsmål til ordføraren viser Halleland til at endringa kjem på toppen av auka straumpris og CO2-avgift. Han skriv også at næringslivet aldri blei informert om endringane.
Halleland bed ordføraren svara på om kommunen var kjent med eindringa i forkant av budsjettvedtaket i Stortinget, og om kommunen vil kunna ta initiativ for å endra ordninga igjen, viss det viser seg at dette får store følger.
Endringa gjeld alle bedrifter, også landbruk og gartnerier.
-Ikkje ei politisk sak
Øyposten har vore im kontakt med Senterpartiet på Stortinget om saka. Geir Indrefjord, finanspolitisk rådgjevar i Senterpartiet, meiner at forslaget er det ikkje politisk motivert.
-Ikkje slik eg les det. Det har nok med det å gjera at distriktsindeksen for Finnøy er endra. Det kan skuldast folkevekst eller betring i arbeidsmarknaden, men skal du ha nærare grunngjeving må du kontakta Finansdepartementet, seier Indrefjord.
-Ville det vore mulig å gjort unntak for øyane utanom Finnøy og Talgje?
-Ikkje så vidt eg veit, endringar blir gjort kommunevis, seier Geir Indrefjord.
På spørsmål frå Høyre i Stortinget svarte kommunaminister Bjørn Aril Gram 12. november i fjor at han følte seg «trygg på» at det ville vera mulig å oppretthalda ulike satsar i samanslåtte kommunar
Ein månad etter blei skatten skjerpa for Finnøy og Vindafjord.