Byggeprosjektet på Judaberg kan bli større

Bustad- og forretningsområdet ved ferjekaien på Judaberg kan bli utvida. Nyleg har utbyggingsselskapet Faa Brygge inngått ein opsjonsavtale med Finnøy Rør om vidare utbygging på deira område på Judaberg.

Publisert: Publisert:
Denne artikkelen er over tre år gammel

FINNØY:

-Avtalen går ut på at Faa Brygge kan overta dagens område til Finnøy Rør, mot å etablera nye, tidsmessige lokaler og innandørs lager for verksemda, opplyser medeigar i Faa Brygge, Stephan Dickinson til Øyposten.,

Finnøy Rør eig naboområdet til Faa Brygge, og ifølge Dickison legg avtalen til rette for ei oppgradering av heile området. Det er Fogn-baserte Gordon Sunde som skal teikna det som skal byggjast i området.

-Når den nye Grieg-basen og utbyggingsområdet vårt blir ferdig vil heile Judaberg få eit løft. Dette vil bli Finnøys svar på Beverly Hills, seier Dickinson entusiastisk.

Området til Finnøy Rør kan gi plass til 4 ekstra einebustader, som vil koma i tillegg til leilighetene og bustadene som alt er planlagt i det eksisterande utbyggingsområdet. Planane omfattar også næringsbygg, og både brannstasjon og lokaler for personellet på ambulansebåten skal få plass i området.

-Forutsetninga er at salget av hus og leiligheter eller næringsbygg går så bra at det er grunnlag for også å byggja ut på området til Finnøy Rør, seier Dickinson.

Ifølge Faa Brygge-medeigaren ser det lovande ut så langt. 3 av 5 leiligheter er selde, mens dei fem einebustadene som førebels er planlagde ennå ikkje er lagt ut for salg. Det blir også bygd småbåthavn i området, og her har det meldt seg interesserte til omlag halvparten av dei 50 plassane, ifølge Dickinson.  Den foreløpige prislappen på investeringa ligg på rundt 70 millionar.

Faa Brygge tilsette nyleg Magnar Emil Eggebø som prosjektleiar for utbygginga. Eggebø skal begynna i jobben første august, og kjem frå tilsvarande jobb med å byggja opp eit kurssenter ved Skoghus leirsted på Senja.

Nils-Ove Bjustveit, dagleg leiar i Finnøy Rør er godt nøgd med avtalen.

-Den vil bety at Finnøy Rør kan få fornya seg og er klare til å møta framtida. Det vil også vera ein fordel å få eit innandørs lager, og sleppa å lagra materialer ute. Dertte vil gi eit finare Judaberg, seier Bjustveit.

Publisert: