Riksantikvaren kom på besøk og blei imponert

Delegasjonen frå avdelinga for kunnskapsutvikling hjå riksantikvaren i Oslo kom på besøk hjå Guttorm Gudmestad på Rennesøy.

|
  • Edd Meby
Publisert: Publisert:
Denne artikkelen er over fire år gammel

Målet med besøket var å oppleva Rennesøy sitt bidrag til storsatsinga Utvalde kulturlandskap (UKL) som høyrer til garden til Gudmestad.,

Dei tilreisande fekk seg ein frisk tur i vakkert kulturlandskap frå garden på Hodne og opp til Rennesøyhodnet, 234 meter over havet. Her har Gudmestad restaurert ei såkalla bygdeborg som sto ferdig i fjor vår. Bygdeborga ligg som er eit vakkert monument på toppen, og er sjølve målet for mange turgåarar. Herifrå har ein fantastisk utsikt over byøyane og Stavanger i sør, og Ryfylke med fjordane i nord.

,-

Kva er motivasjonen din for å vera med på dette?

- Eg har mange gode minner frå bygdaborga då eg var liten og den framleis var i god stand. Dette er ein unik natur- og kulturskatt som eg tykkjer det er viktig at andre skal få ta del i. Å synleggjer det finaste naturen har å by, er viktig. Dessutan er eg oppteken av at folk skal få gode opplevingar når dei ferdast i naturen. Jo fleire som brukar området, jo større kunnskap får ein om området her, seier Gudmestad.

Utvalde kulturlandskap går ut på å ta vare på variasjonane i kulturlandskapet i jordbruket, det biologiske mangfoldet, kulturminner og kulturmiljø.

-  Å ta vare på natur- og kulturarven vår gjennom UKL krev eit aktivt jordbruk, og at bonden/grunneigar gjer dette frivillig, og ikkje minst at han ser verdien av å gjera desse unike landskapa tilgjengeleg for folket. Bønder som er med på dette arbeidet får tilskot gjennom landbruksmidlar, seier landbrukssjef i Rennesøy, Geir Helge Rygg.

,-

Kva er det som får riksantikvaren og hans folk til å komma til Rennesøy?

- Me er ute på ein turné i Rogland og då må me få med oss så mykje som mogleg. UKL-områda er ein viktig del av vårt arbeid, og då er det naturleg for oss å sjå på dei områda som er utvalde her i regionen. Det er jo svært imponerande det som har blitt gjort her, seier avdelingsdirektør hjå Riksantikvaren, Jostein Løvdahl.

Grunnleggande for val av UKL- områda er at dei i størst mogleg grad omfattar jordbrukslandskap med særs store biologiske og kulturhistoriske verdiar. I tillegg skal det vera ei forutsetning å få til langsiktig drift av områda, og at dei  ska vera utprega friluftsområde som byr på unike naturopplevingar.

- Satsinga er eit samarbeid mellom Miljødirektoratet, Riksantikvaren og regionale landbruks-natur- og kulturminneforvaltning. Utvalde kulturlandskapa utgjer eit eksklusivt nasjonalt utval, og representerer dei mest verdifulle kultur-og naturskattane i Norge, seier Nono Dimdy som er med ifrå Fylkesmannen.

Kvart fylke har minst eit område med status Utvalde kulturlandskap. Til saman finns det 46 forskjellige UKL-område over heile landet, og to av desse er i Rogaland. Eit i Rennesøy som består av tre ulike område, og eit i Suldal. Alle områda er i privat eige.

I Rennesøy er det området Hodne-Sel-Dale som dekker sør og austsida av Rennesøy, Førsvoll som ligg midt på, og Helland-Bø som ligg langs kysten på vestsida, og som går frå nord til sør. Alle områda har forskjellige eigenskapar, og er unike på kvar sitt vis.

I år er det 10 år sidan dei fyrste utvalde kulturlandskapa blei plukka ut her i landet. Regjeringa skal i løpet av året løyva 33 millionar kroner til dette prosjektet. Det er ein auke på 175 prosent på fire år. Samstundes er talet på utvalde kulturlandskap dobla.

Oddbjørg M. Måland

 

Publisert: