Miljø Bygg med nye lokalar og framtidstru

– Eigentleg stakk eg berre innom for å forvissa meg om at lokalet ikkje var egna til vårt bruk, smiler dagleg leiar/byggeleiar Stian Nesvåg.

Rett før påske flytta Miljø Bygg frå Fogn, inn i nyoppussa lokalar på Judaberg. Dei tidlegare lokala til Øyposten i underetasjen i bankbygget, har gjennomgått seg eit skikkeleg ansiktsløft, og framstår særs moderne og funksjonelle.

– Arealet er ikkje større enn at det akkurat går, men med smarte og løysingar som maksar ut arealet og potensialet, går dette veldig bra. Me er godt nøgde med resultatet.

Dei gamle redaksjonslokala er mest ikkje til å kjenna igjen. Mørke, utdaterte og lite hensiktsmessige kontor har blitt supermoderne, lyse og lekre. Det gamle, slitne kjøkenet som tidlegare var gøymt bak ei lukka dør, er no løfta fram, og har i si nye og moderne form, blitt sjølve hjarte i lokalet.

– Eg trur det er rett å sei at lokala er totalrenovert. Alt av overflater vegger, tak og golv er skifta, det er lagt opp ny himling slik at det har blitt lydtett mellom romma. Det gamle møterommet har blitt til to nye kontor, og me ha brukt mykje glas i inndelinga av veggene for å få inn så mykje lys som mogleg. Alt arbeid er utført manuelt og speglar såleis imaget vårt, smiler Stian.