Torjus kan gi Finnøy meir pondus

Om Finnøy skulle trenge ein dose fysikk i 5. divisjon, så er Torjus Halsne (25) tilbake i klubben om ikkje lenge.

– I slutten av juni flyttar eg og kjæresten til Finnøy, så om trenaren vil, så er eg akkurat klar til heimekampen 30. juni mot Kvitsøy på Leikvoll, seier den robuste halsnøybuen, som det siste året har budd i Sogndal.

– Eg skal tilbake til ungdomsskulen i Rennesøy og jobba som lærar, men om det er nokon i reiselivet som har ein jobb til dama, så hadde det vore kjekt.

Torjus Halsne var sentral i finnøylaget som spela godt i vårsesongen i 6. divisjon i fjor, og gjekk deretter til 4. divisjonslaget Kaupanger, der han er enno.

– Det er høgare nivå i 4. divisjon, sjølv om kaupanger er eit lag midt på tabellen. Men det går greitt. Eg har vore fast på laget og scora nokre mål.

– Kva rolle har du fått i det laget?

– Eg spelar sentral midtbane, men kunne nok tenkt meg ei meir offensiv rolle. Kunne gjerne vore hengande spiss.

Han har god kontakt med gamle lagkameratar i Finnøy, og fekk med seg både opprykket i fjor haust – og opningskampen mot Mastra.

– Då verka dei litt tafatte og Mastra drepte jo den kampen tidleg. Finnøy kom aldri heilt i gang. Men det er mykje tøffare mostand i 5. divisjon, så det er viktig å kjempa for poengene.

– Kva er ei naturleg målsetting for Finnøy?

– Eg trur både Finnøy, Mastra og Kvitsøy kjem til å vera på den nedre halvdelen av tabellen. Målet må vera å halde plassen.

– Kva kan du bidra med?

– Den fysiske formen er grei, så eg trur eg kan bidra med duellstyrke og hodestyrke, og kanskje score nokre mål. samstundes må eg jo be tidlegare finnøyspelarar som Ruben Eggebø og Jarle Mensink om å ta til vet og komme tilbake til Finnøy!

PS! Finnøy spelar borte mot Tasta torsdag kveld.